Pwy ydan ni:

ym Mhwllheli ac yn gweithio ym Mhen Llŷn a Gwynedd. Wedi’i sefydlu ers 1984 rydym yn bractis bychan profiadol ac amryddawn sydd hefyd yn greadigol ac o feddylfryd technolegol a phragmataidd. Oherwydd ein bod yn gweithio mewn ardal wledig rydym yn gyfarwydd iawn hefo heriau rheoleiddio a rheolau cynllunio sydd ynghlwm â datblygu safleoedd mewn tirwedd eithriadol o sensitif a chadwraethol. Ein hysbrydoliaeth ydy’r tirwedd arfordirol nodweddiadol o’n cwmpas yn ogystal â’r gymuned Gymreig a’i diwylliant. Mae’n dealltwriaeth o’r hinsawdd a natur garw y tirwedd a’n parch tuag at ffurfiau a deunyddiau adeiladu traddodiadol yn dylanwadu ar y ffordd yr ydym yn mynd ati i greu cynlluniau cyfoes ond hefo’r symlrwydd sydd yn ategu’r amgylchedd. Rydym yn bractis dwyieithog sydd yn cynnig gwasanaeth drwy gyfrwng y Gymraeg a’r Saesneg, gan weithio’n agos hefo adeiladwyr a chyflenwyr lleol i ddarparu adeiladau o ansawdd a manylder arbennig yn ogystal â darparu lefel uchel o gynaliadwyedd ac effeithlonlrwydd ynni. Mae gan Dobson Owen enw da’n yr ardal fel penseiri profiadol a chrefftus.Rydym yn bwriadu adeiladu ar y gwaddol hwn ac ehangu ar y dylanwad i wneud cyfraniad pwysig a phositif i’r gymuned a’r ardal leol drwy ddal ati i gynllunio adeiladau a phrojectau o ansawdd uchel o fewn y tirwedd nodedig o’n cwmpas.

Beth rydym yn ei wneud:

Mae’r gwaith a gyflawnir gennym yn amrywiol, ond yn bennaf yn canolbwyntio ar dair sector, sef preswyl, gweithle a chymunedol. Yn y blynyddoedd diwethaf rydym wedi datblygu arbenigedd mewn gwaith preswyl preifat o ansawdd uchel yn cynnwys adeiladu o’r newydd, estyniadau,adnewyddu ac addasiadau sydd yn aml mewn llefydd gwledig heriol ac mewn ardaloedd cadwraethol ym Mhen Llŷn, Parc Cenedlaethol Eryri a thu hwnt. Mae’n harbenigedd hefyd yn weladwy mewn addasiadau a newid defnydd llawer o adeiladau hynafol rhestredig, a’n dealltwriaeth o’r technegau cadwraethol sydd eu hangen wrth weddnewid yr adeiladau hyn. Mae gennym hefyd gryn arbenigedd a dealltwriaeth helaeth ym maes pensaernïaeth cymunedol ac wedi helpu sawl project blaenllaw ar draws Gwynedd i wireddu eu projectau o ran cyllido, cynllunio ac adeiladu. Rhan o’n athroniaeth ydy defnyddio’n gwybodaeth leol, ein profiad a’n dylanwad mewn ffordd bositif i geisio cyfrannu at werth cymdeithasol ein cymunedau, a hwyluso’r broses o greu incwm posibl allan o addasu adeiladau gwag.

Sut ydan ni’n gweithredu:

Bydd y broses yn dechrau drwy wrando’n ofalus ar y cleient, a deall y ffordd orau i arwain a gweithredu yn unol â natur y safle, yr adeilad a’r brîff, y gyllideb a beth sy’n bosib’ yn wyneb cyfyngiadau. Gallwn gynnig gwasanaeth llawn drwy’r holl gamau gwaith RIBA,yn ogystal ag arwain ein cleientiaid drwy’r holl broses gan ddechrau hefo datblygu’r brîff, asesu dichonoldeb a thrafod opsiynau dylunio, arweiniad drwy’r broses caniatâd cynllunio a rheoleiddiadau adeiladu, hyd at adeiladu a phrisio’r project. Mae gennym hefyd fynediad at ddewis eang o arbenigwyr ac ymgynghorwyr yn yr ardal all fod o fudd neu’n hanfodol i wireddu project. Mae’n harbenigedd hefyd yn ymestyn i addasu adeiladau mewn ffordd sensitif yn cynnwys newid defnydd adeiladau rhestredig hanesyddol, gan ddangos dealltwriaeth lawn o dechnegau cadwraethol sydd eu hangen mewn addasu a thrwsio adeiladau o’r fath. Mae’r rhan helaethaf o’n projectau belalch yn defnyddio sustemau edgni adnewyddadwy neu o leiaf un math o ynni adnewyddadwy gan roi cynaliadwyedd ac effeithlonrwydd ynni wrth galon y cynllunio a’r adeiladu. Credwn mai’r ffordd mae adeiladau da yn cael eu creu a’u gwireddu ydi drwy gyfuniad o ddychymyg a realaeth, cadw golwg ar y cyllid, cywirdeb technegol, ond hefyd drwy lawer iawn o benderfyniad a dyfalbarhad.

Y Tîm

Gruffudd Rhodri Evans

Pensaer a Cyfarwyddwr

Wedi astudio yn Ysgol Bensaernïaeth Prifysgol Metropolitan Manceinion a gweithio am flwyddyn yn yr Almaen, dechreuodd Rhodri ar ei brofiad proffesiynol yn arbenigo mewn adeiladau ysgol, cyn gweithio mewn Canolfan Gymorth Dechnolegol Gymunedol‘Community Technical Aid Centre’ oedd yn darparu a datblygu adeiladau cymunedol a phrojectau o gwmpas ardal Manceinion. Yn ddiweddarach dychwelodd at bractis preifat er mwyn cael profiad o addasu, adnewyddu ac ôl-ffitiad safon uchel o adeiladau dinesig a chanol tref, yn cynnwys rhai rhestredig, yn bennaf ar gyfer amryw o defnyddiau masnachol. Symudodd yn ȏl i fyw i’w gynefin yng Ngwynedd ym 2015 a chymryd drosodd rhedeg practis Dobson Owen ym 2021. Ers hynny mae o wedi cynllunio amryw o brosiectau preifat preswyl, yn ogystal â dylunio ac adeiladu prosiectau ar gyfer y gymuned ar raddfa bach a mawr ar draws Gwyned, wedi ariannu gan grantiau a chyllid cyhoeddus. Bu Rhodri’n diwtor rhan amser yn Ysgol Bensaernïaeth Manceinion [MSA] am ddeng mlynedd, ac mae’n parhau i gynnal ambell i adolygiadau cynllunio mewn nifer o brifysgolion.

Derec Jones

Pensaer Projectau

Mae Derec wedi gweithio yn Dobson Owen am bron i 30 mlynedd ac yn bensaer technegol hynod brofiadol sydd wedi cynhyrchu nifer o brojectau preswyl ar gyfer y practis, yn ogystal â phrojectau mawr cymunedol fel Canolfan Y Cywain yn y Bala. Mae ganddo brofiad helaeth iawn o weithio ar brojectau o fewn Parc Cenedlaethol Eryri, a chanddo ddiddordeb brwd a gwybodaeth eang o dechnegau adeiladu ar gyfer adeiladau hanesyddol a phensaernïaeth cadwraethol.

Ffion Gruffydd

Pensaer Prosiect cydweithiol

Mae Ffion yn gynllunydd talentog hefo blynyddoedd o brofiad mewn cynllunio sawl project mawr ar gyfer addysg uwch, ysgolion, a phrojectau gofal iechyd i bractis AHR ym Mryste. Yn ddiweddar gweithiodd Ffion yn hynod o lwyddiannus hefo ni ar gynllunio a gwireddu gweledigaethau ar gyfer nifer o brojectau preswyl o ansawdd uchel yn ogystal ar amryw o brosiectau cymunedol.

Gareth Dobson

Partner Sefydlol

Gareth oedd un o’r aelodau a sefydlodd Dobson Owen a bu’n gyfarwyddwr y practis am bron i 40 mlynedd, ac mae’n dal i weithio’n rhan amser yn y swyddfa. Mae ganddo brofiad helaeth o gynllunio ar gyfer projectau cymunedol a gyllidwyd gan arian cyhoeddus, ac yn ddiweddar bu’n allweddol yn natblygiad Canolfan Y Fron- adeilad aml-ddefnydd ar gyfer y gymuned o ddechrau’r broses hyd ei diwedd.Mae ganddo ddiddordeb brwd mewn cynllunio amgylcheddol,cynaliadwyedd ac effeithlonrwydd ynni mewn adeiladau.

Arfon Jones

Rheolwr Swyddfa

Gyda cefndir mewn cyfrifiadureg a phrofiad mewn rhedeg cwmni adeiladu’r teulu, mae Arfon yn hynod o gymwys i edrych ar ȏl agweddau cyllido a gweinyddol y practis, yn ogystal ag edrych ar ȏl y sustemau TG.

Dewch i weithio hefo ni:

recriwtio Pensaer

Rydym ar hyn o bryd yn recriwtio Pensaer i gydweithio ar amrywiaeth o brojectau cymunedol a phreswyl.

E bostiwch ar post@dobsonowen.com am fwy o wybodaeth.